Historic Environment Scotland

11 October 2023, 10:30

New Scots lug-in guide at Lithgae Palace

New Scots lug-in guide at Lithgae Palace: Linlithgow Scots Audio Guide

Owersettin fur Scots speakers available fur the first time

Visitors can tak in the history o Lithgae Palace in Scots as Historic Environment Scotland (HES) pits oot its first lug-in guide in the Scots leid.

Fowk can gang on the tour wi the new lug-in guide in either Scots or English, but the English version has a fair hantle o Scots in it anaw, fur tae gie aw visitors a sense o the leid o the court and tae mak clear this key and kenspeckle pairt o Lithgae’s bygane.

Visitors will be taen alang on their daunder through the palace by a wheen voices tellin tales o royals sic as wee Princess Elizabeth, dochter o James VI, forby lesser-kent stories o ordinary but important fowk whae bidit and workit there, fae the plumber whase job it wis tae uphaud Lithgae’s iconic fantoosh foontain, tae Mary, Queen o Scots’ chaumer wumman.

There will be insichts intae whit the spaces visitors explore yaised tae look and soond like, and intae whit iveryday life at the Palace wis like, includin whit fowk ett, how they washt their claes, and even whit music they lugged-in tae.

At the time o the 1400s and 1500s, whan Lithgae Palace wis yaised as a royal palace, Scots wis the leid o the Scottish court, spak by the monarch and ordinary fowk alike. Through this new lug-in guide, visitors can access a pairt o Lithgae’s heritage that’s haurder tae get at, or intangible, in a hale new wey, as they lug-in tae the history o the site in a modren version o the language that wid hae been spak at the time.

Fiona Fleming, Project Heid at HES, seyed: “It's been a richt braw journey creatin oor first Scots leid lug-in guide, which we howp will heeze the accessibility and inclusivity o Scots, which is a minoritised leid the day.

“Though dootless maist weel-kent as the birthplace o Mary, Queen o Scots, Lithgae Palace is a site that is stappit fou o a rich taipestry o history. In makkin the new lug-in guide, we were awfie keen tae leam a licht on a braid hantle o fowk and stories fae the Palace’s bygane, sic as the story o Mairgaret More, ane o the wumman kent in historical records as the ‘Moorish Lassies’, and the story o a young chorister laddie, whae’s pleyed by a real-life choir sangster.”

The lug-in guide has been developit by HES wi owersettin and inpit fae Ashley Douglas, a researcher, scriever and owersetter whae specialises in the Scots leid.

The new doonloadable lug-in guide is includit in the ingang price fur Lithgae Palace. Visitors will get a link tae it in their ticket confirmation email whan they prebook online and can syne doonload the tour tae their ain device afore visitin, aw set tae lug-in tae in either Scots or English.

Lithgae Palace is open ivery day fae 10am tae 4pm (lest entry 3.30pm) fae 1 October tae 31 Mairch, and fae 9.30am tae 5.40pm (lest entry 4.45pm) fae 1 April tae 30 September.

Fur mair information and tae book yer tickets, please heid ower tae the Historic Environment Scotland wabsite.

Ends

Contact Information

Laura Ely
Communications Officer
Historic Environment Scotland
0746 875 9137
laura.ely@hes.scot

Notes to editors

Notes fur editors:

Aboot Historic Environment Scotland

  1. Historic Environment Scotland (HES) is the heid body fur Scotland’s historic environment, a chairity dedicatit tae the heezin o heritage, culture, education and environmental bieldin. It taks the lead on researchin and unnerstaunin the historic environment and dealin wi the impacts o climate chynge on its future, speirin intae and recordin architectural and archaeological sites and launscapes across Scotland and takkin tent o mair nor than 300 properties o national mense and importance.
  • Historic Scotland, Scran, Canmore, The National Collection of Aerial Photography (NCAP), The Engine Shed, Stirling Castle and Edinburgh Castle are aw sub-brands o Historic Environment Scotland.
  1. Historic Environment Scotland is a registert Scottish Chairity. Scottish Chairity No. SC045925
  2. Ye can keep yersel up tae date wi news fae Historic Environment Scotland and register fur media release email alerts. If ye’re wantin tae unsubscribe, please get in touch wi us.
  3. Ye can follae Historic Environment Scotland on Twitter, Facebook, Instagram, LinkedIn and oor blog.

Fur mair information, please get in touch wi:

 

Laura Ely, Communications Officer

Historic Environment Scotland Media Office 

Mobile: 0746 875 9137

Email: laura.ely@hes.scot

About Historic Environment Scotland

  1. Historic Environment Scotland (HES) is the lead body for Scotland’s historic environment, a charity dedicated to the advancement of heritage, culture, education and environmental protection. It is at the forefront of researching and understanding the historic environment and addressing the impacts of climate change on its future, investigating and recording architectural and archaeological sites and landscapes across Scotland and caring for more than 300 properties of national importance. HES is also the lead on delivering Scotland's strategy for the historic environment, Our Past, Our Future.
  2. Historic Scotland, Scran, Canmore, The National Collection of Aerial Photography (NCAP), The Engine Shed, Stirling Castle and Edinburgh Castle are sub-brands of Historic Environment Scotland. 

3. Historic Environment Scotland is a registered Scottish Charity. Scottish Charity No. SC045925 

4. Keep up to date with news from Historic Environment Scotland and register for media release email alerts. You can unsubscribe at any time by following the unsubscribe link included in every email.

5. You can follow Historic Environment Scotland on X, Facebook, Instagram, LinkedIn and our blog.